Polo norte de Galicia

O Camiño do Litoral é un gran itinerario paisaxístico e cultural que percorre o litoral galego (o máis extenso de toda España cos seus 2.555Km) dende Ribadeo ata A Guarda . En 52 etapas que percorren 78 concellos e cunha lonxitude de 1.373Km, que se poden facer andando ou en bicicleta, pasaremos pola Costa Ártabra , Costa da Morta , rías Altas e Baixas , parques naturais,espazos da Rede Natura 2000, etc. Veremos castros, dólmenes, castelos, igrexas e ermidas, vilas e pobos costeiros, praias e calas paradisíacas,... Ideal para facer en tramos cortos de fin de semana ou pequenas vacacións, para cicloturistas, camiñantes, afeccionados ao turismo slow, etc. O outono e a primavera son as estacións máis axeitadas para animarse a facer este camiño.

Outro dos fermosos refuxios do río Sor é este do Muiño da Furada , tamén en Mañón . Podemos chegar a el pola marxe de Mañón , na ruta de sendeirismo que vai dende a Ponte do Porto ata o refuxio de Ulló , e máis ou menos no medio, atoparemos esta abraiante beleza. Pero se queremos achegarnos en coche, despois de cruzar a ponte do Porto cara ao Vicedo , seguimos a estrada á beira do Sor hacia a desembocadura e pouco despois atoparemos a ponte colgante para cruzar outra vez o río e chegar ata o refuxio do Muiño da Furada . En días de calor, preto desta ponte podemos ver a excursionistas bañándose. Uns poucos metros río arriba, atoparemos a área recreativa do refuxio. Outro marabilloso refuxio climático natural para os días máis calorosos do verán.

Á beira do río Sor , no concello de Mañón , está este refuxio do Cascón . Para os afeccionados ao sendeirismo, pode ser punto de partida ou de paso das rutas que hai no concello. Tamén en días de calor abafante pode ser un refuxio climático para pasar o día disfrutando da sombra e do fermoso entorno.

Nas Fragas do Eume hai varias rutas que nos permiten coñecer este tesouro da nosa terra: senda dos Encomendeiros, camiño da Ventureira, camiño dos Cerqueiros, Altos de Fontardión, parque etnográfico do Sesín,... Posiblemente a máis coñecida sexa a dos Encomendeiros . Dende a Alameda onde se deixa o coche, camiñando ata a primeira ponte colgante do Cal e seguindo a senda río arriba ata o mosteiro de Caaveiro para logo voltar ata a alameda. Desta volta, ao chegar á seguinte ponte colgante de Fornelos , decidimos cruzala e regresar ata a alameda. Case 10km e medio. De "ponte a ponte" unha marabilla! Chegounos.