Polo norte de Galicia

O castelo de Moeche , na parroquia de S. Xurxo en Moeche , é un castelo do s.XIV que pertenceu aos Andrade . É de planta octogonal irregular cun foxo escavado na rocha no lado oeste e no lado leste a entrada defendida con baluarte apegado de planta tamén irregular. A torre homenaxe de 18m de altura é unha das partes mellor conservadas e dende o patio de armas accédese a varias estancias no interior. No exterior salientar varios escudos de armas e as saeteiras e pequenas fiestras con arcos de medio punto. Os anchos muros son de cachotería de lousa e de granito do Forgoselo. Chama a atención a súa situación na cabeceira do val de Moeche en lugar de estar nunha zona máis alta. Foi escenario da primeira Revolta Irmandiña , cando Roi Xordo ao mando da Irmandade Fusquenlla chega ao castelo para acabar con Nuno Freire de Andrade, o Mao , que xa fuxira ao castelo de Andrade . Máis tarde o conde de Lemos , Pedro Álvarez de Osorio obriga aos Irmandiños a reconstruir o castelo ...

En realidade son as ruinas dun castelo, nun rochedo á beira do río Castro en Naraío , no concello de San Sadurniño . Os documentos máis antigos din que o castelo de Naraío pertencía a Gonzalo Pineyro, señor de Naraío e partidario de Pedro I nas súas loitas fraticidas con Enrique de Trastamara , o cal ao subir ao trono arrasará o castelo e cederallo aos Andrade , ata que en 1466 foi destruido por Afonso Lanzós durante as Revoltas Irmandiñas . Na actualidade pertence á Casa de Alba , cedido por uns anos ao concello. A torre homenaxe é o que mellor se conserva, pero a pesares de todo, ben merece unha visita polas vistas e o entorno. Moi preto, no mesmo río Castro está a fervenza de Naraío e ao carón do castelo pasa a ruta dos Sendeiros do río Castro.

A senda que une S. Felipe con S. Cristóbal é curta e moi doada, con vistas impresionantes da entrada da ría de Ferrol , con xoias patrimoniais coma o Castelo de S. Felipe , os restos do fortin de S. Carlos ou a batería de S. Cristóbal (os dous últimos mostran abandono) ou xoias paisaxísticas coma as calas preto do castelo de S. Felipe ou a ribeira de S. Cristóbal . Chegando a S. Felipe dende Brión a panorámica da entrada da ría é espectacular. A senda comeza a carón dun pequeno parque infantil preto do castelo. Como é curta e doada resulta axeitada para calquera idade e condición física.   ;&nbsp Ao chegar aos restos do fortín de S. Carlos unha pequena parada para velo de preto e comprobar que está en peor estado cá ultima vez que o visitamos. Seguimos a senda e pouco despois a fermosa ribeira de S. Cristóbal centra a nosa atención.    Xa no camiño de volta a letra daquela canción dos Limones vén á miña mente:          ...