Polo norte de Galicia

Aínda que está moi preto da casa, a beleza da praia de Seselle segue impactándome. Estes paseos de inverno pola praia solitaria enchen de calma o espíritu e son unha fonte de saúde tanto física coma mental. Hai que disfrutalos!

Un paseo mañaneiro, o sábado pasado, pola praia de Seselle pode resultar un deses magníficos agasallos que podemos facernos a nós mesmos: bo para a saúde tanto física coma mental, gratis e polo tanto bo para loitar contra o consumismo, bo para desconectar das redes e usar o teléfono so para facer fotos, bo para disfrutar das pequenas cousas e da vida sinxela, bo para esquecer as malas novas que parecen ameazar o mundo, ...

       ... Salid a encontrarla por esos caminos. ¡Va loca de soles y loca de trinos! Doña Primavera de aliento fecundo, se ríe de todas  las penas del mundo...       ...   Os versos de Gabriela Mistral que acuden á mente ante o espectáculo que nos brinda a natureza nun camiño de Seselle ...

Eses momentos que quedan gravados na memoria! Un paseo pola praia de Seselle-Raso unha tarde de febreiro pode proporcionarnos moitos deses momentos. A inmensidade do areal ofrecendo toda a beleza do inverno na ría de Ares . O can, gardián da praia, controlando a ría. A beleza da costa de Bezoucos é moita!

Coñecidos coma baños de bosque ou shinrinyoku eses paseos na natureza que fortalecen tanto a saúde física coma mental, son tendencia nas páxinas adicadas á saúde, xa que fortalecen o sistema inmunolóxico e reducen as emocións negativas, os niveis de ansiedade,... Nestes paseos polo bosque ou calquera outro espazo natural, non transitado, deixando de lado as présas, non hai que recorrer unha distancia determinada, nin tampouco realizar un determinado esforzo físico. Debe servir para desconectar das rutinas, dos hábitos pouco saudables do sedentarismo; procurando o silencio, sin máis estímulos cós da natureza. Na contorna de Seselle , polos camiños, carreiros, vieiros, corredoiras, congostras, corripas, outeiros,... practicámolos dende hai anos, sen saber que eran baños de bosque. Penso que á clase política do noso país, nestes momentos sentaríanlle moi ben estes paseos ( non terían porque ser na contorna de Seselle).

A praia é un dos mellores lugares para aliviar o estrés e acadar a calma. De feito é recomendable ir á praia regularmente para conseguilo. O ritmo das ondas, o seu movemento e son, inflúen nos nosos ritmos internos producindo un efecto calmante. Os que temos a fortuna de vivir preto dunha praia e podemos ir camiñando ata ela pola mañá cedo, cando somos pouco máis dunha ducia de persoas disfrutando dela: uns camiñando, outros correndo, nadando, pescando, facendo ioga, etc, somos uns privilexados. Chegar ata as escaleiras que baixan á praia das Regueiras en Seselle , e facer unha paradiña para marabillarme coa paisaxe da ría de Ares sempre é o comezo da miña sesión de relax. Non importa que o ceo estea cuberto ou despexado, non importa a estación do ano,... disfrutar dos espazos naturais amplos aporta tranquilidade e serenidade. Debemos vivir de maneira moderada, sendo máis conscientes das verdadeiras necesidades buscando o noso lagum persoal.

Camiñar diariamente e a bo ritmo é un dos exercicios máis saudables e aptos para todo o mundo e si o facemos pola praia din os expertos que poden aumentar os beneficios. Vivir preto dunha praia ofrécenos a oportunidade de dar estes paseos . A praia de Seselle coa súa lonxitude é magnífica para esta actividade. A min gústame facelo pola mañanciña, cando aínda o sol está baixo e na praia so estamos unhas poucas persoas: camiñantes, corredores, pescadores,... O máis importante é disfrutar do paseo, notar como desconectamos para deixar que a calma e o relax ocupen o lugar das prisas e preocupacións. Paraísos para desconectar!

En Galicia temos moi claro o importante papel que desempeñou a emigración no ámbito educativo e a contribución fundamental deste numeroso colectivo na creación da primeira rede escolar na nosa terra. No noso pequeno concello de Ares temos catro fermosos exemplos destas escolas : a Alianza Aresana de Instrucción fundada na Habana en 1904 e que inaugura a escola das Alianzas en Ares en 1908; a Agrupación Instructiva de Caamouco , fundada tamén na Habana no 1911 e que inaugura a escola da Tenencia no 1915; o Centro Instructivo, Recreativo e Social de Cervás na Habana e Estados Unidos que inaugura a súa escola no 1925 e por último, a Escola de Seselle , construida coa iniciativa privada dun único emigrante, Gaspar Vizoso Cartelle , e inaugurada no 1931. En Seselle ata o 1931, non houbo escola e a rapazada tiña que ir a Ares; posteriormente na casa dos Duráns, no Froés, deuse escola durante uns anos. A foto desa casa dos Duráns é posterior, da década dos 60, xa en moi mal estado....