Polo norte de Galicia

Aproveitando unha tarde que quedou solleira, entre frente e frente da borrasca Nelson , fomos ata a impresionante praia de Ponzos . Paraísos de Ferrolterra !

Na parroquia de Bermui ( concello de As Pontes ) atopamos esta senda fluvial que segue o curso do rego das Foxas que desemboca no Eume . Discorre baixo unha magnífica fraga, que nesta época aínda ten as súas árbores espidas, e por un percorrido cómodo, agás a carón das fervenzas, onde pode resultar perigoso. No inicio da senda un pequeno letreiro de madeira indica "fervenza e muiños" e ao pouco xa atopamos o primeiro muiño. Poucos metros máis adiante , ao outro lado do rego, atopamos o segundo, xa na parte onde comeza a caída da fervenza. Uns metros de subida e un letreiro recorda o perigo da baixada ata a fervenza e os outros dous muiños. Hai que ter coidado!, pero o que atopamos é unha fermosura!. Desta volta non seguimos a senda ata o río Eume , pero é unha opción que merece a pena.

Despois da praia de Areamorta en Redes , ría adentro, están a pequeniña cala de O Portiño e a última das praias do concello de Ares dentro da ría, a praia de Río Sandeu , compartida co concello de Fene , xa que o rego Río Sandeu é a fronteira dos dous concellos. Moi protexidas, de area fina e dourada, son praias de augas tranquilas e moi utilizadas coma fondeadeiros nas xornadas estivais. Rodeadas da vexetación propia do interior da ría, que crea un telón de verdor arredor delas, son praias moi fermosas.

Cando un vive no paraíso non hai nada que engadir. ( Praia Pequena de Chanteiro ).

En Mañón , a máis de 30m de altura sobre o río Sor , está este miradoiro do Couce ou de Augas Caídas , no lugar no que o rego Seixo verte nesta grande fervenza as súas augas ao río Sor , que baixa encaixonado na serra da Coriscada . É un miradoiro espectacular con área recreativa e pequeno refuxio; del baixa o desnivel ata o río Sor un estreito carreiro que nos leva ata a fervenza. Área recreativa moi especial si queremos relaxarnos neste entorno de fraga co sonido da auga acompañándonos ou para descansar despois de facer a ruta que chega ata aquí.

Achegarse no inverno, despois de días chuviosos, ata a fervenza de Augas Caídas en Mañón é perfecto. Deixamos o coche arriba, a carón do Miradoiro do Couce ou de Augas Caídas e seguimos a serpenteante baixada duns minutos ata o río Sor. Cunha caída de máis de 30m. o rego Seixo verte a súa auga ,na poza de Bimbes , ao río Sor que separa os concellos de Mañón e O Vicedo . Todo un espectáculo que merece a pena ser visitado en época de choivas!

A praia de O Coído é unha das catro praias que o concello de Fene ten na ría de Ares . Praia resgardada e ben orientada, de area fina e escura rodeada da vexetación típica das ribeiras do interior da ría. Nun día de inverno está case deserta, pero no verán está moi concorrida e numerosas embarcacións fondean nas inmediacións para pasar as xornadas festivas. Tesouros da Costa de Bezoucos !