Polo norte de Galicia

Mirar ao noso arredor e descubrir recunchos máxicos e fermosos, lugares que enchen de paz o espíritu e que convidan a quedar neles, sitios que nos abraian e que nos deixan sen palabras,...en Galicia hai moitos. Unha sinxela ponte medieval sobre un rego pode ser ese recuncho. En Monfero , sobre o Rego dos Curros no lugar onde desemboca no Río Frai Bermuz , atópase este recuncho de gran beleza. Para disfrute dos sentidos!

A tarde de onte, con boa temperatura e sen vento, resultou estupenda para facer a ruta do Camiño dos Cerqueiros , no corazón das Fragas do Eume . É unha das varias rutas que podemos facer nas Fragas, e agora case rematando o inverno, observar o bosque antes da saída das novas follas nas árbores de folla caduca, dános outra visión da fraga. Nesta ruta circular de 8,5km a beleza do entorno é espectacular. A dificultade é baixa e so precisamos gañas de camiñar. Desta volta non nos achegamos ao miradoiro de Carbueira, porque xa caía a tarde e aínda nos quedaba un bo treito de ruta. Para outra ocasión!

Nas nosas andainas e viaxes polo norte de Galicia , unha das cousas que máis chama a nosa atención é a arquitectura popular . Sempre atopamos un muíño, unha ponte, unha casona, un lavadoiro ou fonte,...que nos obrigan a facer unha paradiña para contemplalos con detalle. Onte, estas casiñas de pedra de Monfero foron as protagonistas. A pedra, ese material por excelencia das construcións populares, confírelles un aspecto rústico e auténtico, integrándoos perfectamente coa paisaxe e o medio natural. Estas construciós parecen xurdir da terra, rodeadas por hortas ou xardíns que realzan aínda máis a súa beleza. Unha gozada!

Había 7 anos que non pisabamos este miradoiro e onte decidimos achegarnos ata el. O miradoiro do Eume ( Monfero ) está na Serra de Sanguiñedo , nas Fragas do Eume . Subimos pola estrada que pasa diante da ermida de S. André e deixamos o coche ao comezo da pista de terra. Os primeiros centos de metros son de subida suave, e a pista en bo estado ata a Pena do Teixo , onde está o miradoiro. Dende este, vemos o canón do Eume, partes do embalse, o Forgoselo, o monte de Fortandión, a cheminea de As Pontes, montes de Muras e Xermade,... Logo intentamos chegar ás fragas da beira do río, por unha das rutas marcadas, pero despois duns centos de metros, a pista estaba con bastante maleza e (por temor ás carrachas) non seguimos. Xa de volta paramos tamén no miradoiro de Cabría ( Pontedeume ), dende o cal a desembocadura do Eume na ría de Ares é todo un espectáculo.

O monte de Pena Fexa en Monfero , cos seus 709m é un dos montes máis altos da provincia de A Coruña . Dende o seu miradoiro podemos ver unha extensión de territorio moi grande: a Serra da Loba , o Serrón do Lobo , o Cordal de Montouto , o val de Xestoso ,.... Está moi preto doutros dous miradoiros: o Pico de Vales e o da Carbueira que permite facer a ruta dos tres miradoiros nun día de boa visibilidade para disfrutar das vistas. Ben preto, no monte Pena da Uz (705m), no lugar de Sta Xiá nace o río Lambre .