Polo norte de Galicia

Coas numerosas borrascas que nos chegan, asociadas a avisos por precipitacións, están os ríos desbordados ou en risco de desbordamento. Achegarse a calquera deles, sexa nas súas beiras, fervenzas, encoros,...é un espectáculo. O encoro do Eume desbordando.

A área recreativa de Formariz , a carón do Belelle , no concello de A Capela , é un deses fermosos lugares que nunca nos cansamos de visitar. En calquera estación do ano, a natureza deste recuncho é un bálsamo para o espíritu.

Nesta terra do norte de Galicia , achegándote a un curso de auga, aínda que sexa pequeno, atoparás un muiño (polo menos). No país dos milleiros de ríos e regos, lóxicamente non poden faltar os milleiros de muiños ao seu carón, esperando as súas augas para lembrar cal era a súa función. A maioría deles esmorecendo entre fietos e hedras, soñando con tempos pasados, cando os veciños facían as muiñadas e as risas e cantigas dun pobo enchían os seus días. Dá magoa ver estes tesouros neste estado de abandono. Coa chegada do outono parecen estar máis sós. (Muiño de Vilariño- A Capela).

Nun caloroso serán de xullo, un paseo pola beira do río Belelle (no concello de A Capela , no tramo entre Cabalar e Formariz ) é un luxo! Baixo a sombra do bosque de ribeira seguimos o curso do río, silandeiro unhas veces e cantareiro noutras, disfrutando desta fermosa paraxe. Nunha publicación anterior xa describín con detalle esta ruta; desta volta, unhas imaxes abondan. Paraisos do norte de Galicia !

Un paseo moi aconsellable para un serán de verán pode ser este do Parque etnográfico do río Sesí n (concello de A Capela ), do que xa falamos ampliamente nunha publicación anterior no blogue. Un parque que é unha fermosa homenaxe dos habitantes deste concello aos seus devanceiros, que souberon explotar os recursos naturais sen esgotar nin destruir o medio. Nel, ademais da maxia e a fermosura do entorno, atopamos explicados exemplos do rico patrimonio etnográfico das tradicións artesanais vencelladas á explotación dos recursos e algunha mostra da arquitectura tradicional (muiño, ponte, curripa,...). Se gustamos do paseo podemos continualo polo Camiño Vello de Caaveiro e achegarnos ata a Casa do Pazo ( Museo Etnográfico).

O Camiño vello a Caaveiro é un antigo e fermoso camiño medieval, en plenas Fragas do Eume , que leva dende as casas de As Neves (A Capela) ata o mosteiro de Caaveiro . Deixamos o coche no lugar de O Pousadoiro e e uns centos de metros máis abaixo chegamos ao enlace que vén do lugar de O Pazo e o camiño xa coincide coa GR55 ou ruta do Medievo . Esa gran ruta de 90km que une Betanzos con S. André de Teixido , e que ten bastantes km que pasan por este concello de A Capela . O camiño cada vez ten máis pendiente e cun chan tan irregular e pedregoso, resulta esixente. A fermosura da fraga fai que mereza a pena! Despois dos 2,5km de baixada chegamos á ponte que atravesa o río Sesín . Baixamos ata o río para ver a ponte dende abaixo, os restos do muiño e os saltos da auga que producen un son atronador que nos rodea. Despois dun pequeno descanso, disfrutando da beleza do entorno, emprendemos o regreso; outros 2,5km, esta vez de forte subida, nos esperan. Con alg...