Polo norte de Galicia

Unha tarde de decembro fresca e anubrada, tamén é ideal para achegarse ata a praia de A Barrosa . O espectáculo da entrada da ría de Ares , cun ceo plomizo e o mar en calma é marabilloso. Despois de baixar as escaleiras, camiñar sobre as pedras e achegarse ata a orilla para ver o mar bicando a ribeira, observar o voo das gaivotas, unha ave rapaz no ceo sobrevoándonos,... Momentos de calma e relax! As escaleiras que hai que subir para marchar, son un pequeno pago por tanta beleza!

Achegarnos ata A Barrosa , ben camiñando pola senda da costa ou ben en coche ata a mesma praia, é algo que facemos moi frecuentemente. Non importa a época do ano, ou o como estea o día, para observar a entrada da ría, o estado do mar, un solpor, recoller paus ou cunchas na ribeira, deixar que a música da marea nas pedras relaxe a mente,... A Barrosa é sempre un paraíso!

A praia da Barrosa é unha das perlas da ría de Ares . Con esta beleza non é raro que sexa unha localización escollida para películas e series. En calquera momento, achegarse ata ela e mirar a ría é un pracer. Paraísos de Ares !

No xornal La voz de Galicia de hoxe falan da estrea na TVG da película "Os amantes de Abrente" , baseada na serie "Saudade de ti" . Esta serie ten moitas escenas de exteriores filmadas no concello de Ares . Unha das fotos que ilustra a noticia mostra unha escena rodada na Barrosa. A Barrosa "namora".

Xa di o refrán que antes da tormenta vén a calma. A borrasca Óscar causando estragos no país e en Ares , onte ás cinco do serán, esta era a calma que había na ría: o mar tranquilo coma un prato víase así dende A Barrosa ! Achegarse ata esta cala para admirar a ría, otear o horizonte, observar os movementos dun mergullador saíndo do mar ou das gaivotas, notar a airexa que refresca a calor abafante destes días,notar o aroma das madreselvas no cantil... todo un luxo! Vivimos no Paraíso .

As novas tecnoloxías están cada vez máis presentes nas nosas vidas, convertíndose nunha necesidade incluso para os máis pequenos e podendo chegar a ser unha adicción, e polo tanto unha ameaza para a saúde tanto física coma mental. Ante o risco desta dependencia tecnolóxica hai que facer actividades de desconexión dixital para protexer a nosa saúde. Unha destas actividades pode ser un paseo pola praia. O mar axuda a baixar ou eliminar o estrés. Mellora a nosa saúde mental e emocional. O son das ondas, o chío das aves, ás veces o silencio total, o alivio visual ao observar a ribeira, ou contemplar o solpor, ... son experiencias fundamentais para a nosa saúde e polo tanto é preciso ser capaz de aprecialas e debemos compartilas cos máis pequenos da familia, para que aprendan a aprecialas e disfrutalas. Hai que deixarse envolver pola beleza da natureza que nos rodea e disfrutar.

Que dicir desta fermosura? En calquera época do ano, con calquera tempo atmosférico, en solitario ou ben acompañada,... Sobran as palabras.

En Ares podemos presumir de praias. Entre as que están máis protexidas do nordeste temos esta. As vistas da ría son espectaculares. As illas Mirandas parecen centinelas gardándoa. Con marea baixa é moi entretido observar a vida que habita en cada poza.