Polo norte de Galicia

Achegarse a Punta Penencia en Doniños para contemplar o Atlántico en todo o seu esplendor, nun día de moito mar de fondo, resulta moi tentador non pasar horas mirando para el. Co forte vento a sensación térmica era de friaxe e conformámonos coa contemplación dende o coche. O paseo pola praia queda para outro día. Doniños espectacular!

A parroquia de Covas, en Ferrol , ten tantos atractivos que resulta moi longo enumeralos: o cabo Prior co seu faro e os restos das baterías costeiras , unha longa lista de fermosas praias e calas , rutas para camiñar, etc. Aproveitando un dos días que quedan de inverno achegámonos ata Covas para empaparnos coas súas paisaxes.

A costa Ártabra é un cofre cheo de tesouros que hai que ir descubrindo pouco a pouco. Na costa norte do cabo Prior , polo estrada que nos leva ata o faro e as antigas baterías costeiras, podemos coñecer algúns destes tesouros. Preto da cetárea está a cala e o pequeno porto da Coba , e máis adiante a pequena cala do Cabaliño . Se gustamos de andar nas ribeiras e descubrir pequenas calas, esta costa é perfecta.

A Coviña é un pequeno porto natural situado ao pé do cabo Prior e moi protexido de ventos e temporais por este. Posiblemente estea relacionado co pasado medieval da parroquia de Covas ( Ferrol ), cando aquí había un importante porto baleeiro e unha granxa-factoría encargada do tratamento das capturas. Esta granxa pagaba o diezmo ao mosteiro de Sobrado , o cal foi moi disputado durante décadas polos Andrade . Dende a estreita estrada que nos leva ata A Coviña as vistas, da costa de Covas e do Golfo Ártabro , son espectaculares.

A praia de Esmelle , entre as praias de S. Xurxo e A Fragata ( Ferrol ), é outro recuncho moi fermoso da costa de cabo Prior . A súa area, o seu mar, o entorno,... fan que sexa moi frecuentada no verán. Cando remata a tempada estival podemos atopala con apariencia dunha praia virxe. Toda para nós! Disfrutando destas tardes solleiras de setembro no norte de Galicia.

Sabemos que resulta moi recomendable camiñar pola praia, sabemos do efecto relaxante do son das ondas, dos beneficios de pisar a area, que respirar o aire do mar mellora as doenzas pulmonares, alerxias, etc. Por todo iso, e moito máis, un paseo pola praia sempre é unha boa elección. En Ferrolterra hai tantas praias e calas para escoller, que cada día podemos ir a unha diferente. A praia de A Fragata , en Covas ( Ferrol ), non a coñecíamos. Foi todo un descubrimento, porque é moi fermosa, e o entorno impresiona pola súa beleza. Paraísos do norte que descubrir!

A costa ártabra está tan colmada de fermosos recunchos que sempre atoparemos sendas, camiños, carreiros,...para percorrer e disfrutar dese océano que divisamos dende ela. Este pequeno paseo no concello de Ferrol , dende Cariño ata S.Cristovo , permítenos observar a entrada da ría de Ferrol dende a banda norte, a Punta do Segaño e Montefaro na banda sur, no concello de Ares . Os restos do pequeno castelo de S. Cristovo ( nun estado de total abandono) e o pequeno faro que está o seu carón son testigos do balbordo que este océano produce en días de temporal; así a todo hoxe móstranos a súa mellor faciana e resulta imposible non achegarse ata el. Seguimos a senda que bordea a ribeira ata preto da batería de S. Carlos e damos volta.

Coa borrasca Nelson azotando o país nestes días pasados, calquera momento de calma era idóneo para unha escapadiña a observar a costa. En Sta Comba , a praia e o océano lucían así de espectaculares! Paraísos do norte de Galicia!