Polo norte de Galicia

Neste comezo de abril tan chuvioso outra fervenza que hai que visitar é a do río Xestosa , no límite dos concellos de Ourol e Muras . O Xestosa , tamén coñecido coma Xanceda , é afluente do Landro . Falta aínda moito verde nas árbores da fraga, so os piñeiros da baixada lucen as súas agullas, pero o espectáculo da auga merece a visita.

Despois de tanta choiva os ríos van tan medrados que os milleiros de fervenzas que hai en Galicia están espectaculares. O río da Xestosa ou da Xanceda cando deixa o concello de Muras e entra no de Ourol, atravesa unha zona rochosa e con desniveis, provocando varias fervenzas. A máis grande, ten unha altura duns 20m. e agora loce en todo o seu esplendor. Ao estar situada a poucos metros da estrada Muras-Viveiro, resulta moi doado acceder a ela. Pouco despois o río Xestosa desembocará no Landro.