Polo norte de Galicia

Os paseos e sendas fluviais son moi abundantes na nosa terra, e aínda que sexan diferentes pola lonxitude, conservación, etc., a maioría son moi fermosos e resulta un pracer camiñalos. Con estes días de verán de moita calor, pasear á beira dun río é marabilloso. O Paseo dos Soños en Vilalba , a carón do río Madalena , comeza no Muiño do Rañego e discorre á beira do río ata a Ponte dos Freire . A Irmandade Manuel María e a Asociación C. Xermolos iniciaron no 2006 unha homenaxe a varios autores destacados da bisbarra, cunha serie de esculturas colocadas ao longo do paseo. Que gra riqueza temos nos nosos ríos. Que importante é coidalos!

A finais de abril, cunha explosión de beleza e verdor na natureza, calquera lugar é unha fermosura: costa, monte, paraño, unha senda,un río,... e con tanto onde elexir ás veces resulta difícil. Decidimos seguir cos ríos e desta volta dirixirnos ata o curso alto do Eume . Recorrer eses estradas rurais que nos achegan á beira do río, entre montañas, con pequenos rueiros e casas espalladas (moitas abandonadas), que humanizan estas paraxes. O Eume , ao longo dos seus 80Km de lonxitude, ofrece moitos lugares e recunchos ben coñecidos para visitar e disfrutar ( As Fragas do Eume , Caaveiro , Os Canóns do Eume , O Caneiro , etc.). Posiblemente sexa menos coñecido o seu curso alto, dende As Pontes ata o seu nacemento na parroquia de Montouto do concello lugués de Abadín . E esa foi a nosa elección para esta excursión. Paraísos do norte!

Ourol é un dos concellos que visitamos frecuentemente cando buscamos montes e alturas dende os que otear amplos horizontes nos que sorprenden pequenos rueiros espallados entre montañas e vales. Desta volta, achegámonos ata a parroquia de Xerdiz , cun igrexario no que parece que o tempo parou! A gran igrexa rodeada do camposanto habaneiro, a vella casa reitoral, o fermoso cruceiro, o campo da festa,.., todo fala doutro tempo pasado, rodeados de silencio...

Un día buscando fotos na rede da antiga escola de Seselle , atopei esta foto do CIN de Bretoña . E tirando do fío, descubrín que ademais do noso Seselle de Ares (A Coruña), hai un Seselle en A Pastoriza (Lugo) e outro en Oza-Cesuras (A Coruña). Pensei que había que coñecelos e busquei máis información. Comezamos co Seselle de Lugo. É unha aldea da parroquia de Bretoña ( A Pastoriza ). O centro desta parroquia, levantado sobre un antigo castro é un centro urbano que mestura o rural e o indiano. No centro da praza principal, chama a atención a estatua do bispo Mailoc . Personaxe ligada á historia dos bretóns chegados ata aquí no s.VII e fundadores da antiga Britonia . A carón da praza está o interesantísimo Centro de Interpretación de Bretoña , nun fermoso edificio recuperado polo concello. Nas tres plantas do CIN atopamos ampla información da historia do Bispado Britoniense e de Mailoc , da prehistoria da Pastoriza, da arqueoloxía de Bretoña, fotografías antigas do conce...