De Seselle a Seselle
Un día buscando fotos na rede da antiga escola de Seselle, atopei esta foto do CIN de Bretoña.
E tirando do fío, descubrín que ademais do noso Seselle de Ares (A Coruña), hai un Seselle en A Pastoriza (Lugo) e outro en Oza-Cesuras (A Coruña).
Pensei que había que coñecelos e busquei máis información.
Comezamos co Seselle de Lugo. É unha aldea da parroquia de Bretoña (A Pastoriza). O centro desta parroquia, levantado sobre un antigo castro é un centro urbano que mestura o rural e o indiano. No centro da praza principal, chama a atención a estatua do bispo Mailoc. Personaxe ligada á historia dos bretóns chegados ata aquí no s.VII e fundadores da antiga Britonia.
A carón da praza está o interesantísimo Centro de Interpretación de Bretoña, nun fermoso edificio recuperado polo concello.
Nas tres plantas do CIN atopamos ampla información da historia do Bispado Britoniense e de Mailoc, da prehistoria da Pastoriza, da arqueoloxía de Bretoña, fotografías antigas do concelloda Pastoriza,e outras curiosidades.
Victoria, a xove e entusiasta historiadora que nos fixo a visita guiada resultou un tesouro.
Despois de comer achegámonos ata o castro de Saa na parroquia de Baltar.
É un asentamento da época galaico-romana que está en proceso de excavación e do que vimos algúns dos obxectos atopados, no CIN.
A carón do castro pasa a ruta das Augas de Fonmiñá e alá fomos. A Lagoa de Fonmiñá, un fermoso espazo natural ademais da lagoa na que rexorden as augas subterráneas do Miño en varios puntos, aumentando o seu caudal, conta cunha fermosa área recreativa e outro centro de interpretación (pechado por obras).
Despois da Lagoa de Fonmiñá fomos ata o Pedregal de Irimia, na Serra de Meira, a 3Km da vila de Meira.Este pedregal de orixe glaciar é coma un río bastante longo de grandes pedras que baixa pola aba do monte. Baixo estas pedras nace o regato que dá orixe ao Miño. Este regato mana dende unha enorme balsa de auga que está baixo a serra e o val de Meira, e desta balsa afloran mananciais en varios puntos.
Parece un humilde nacemento para semellante río.
Paraísos do norte de Galicia!
Comentarios
Publicar un comentario