Polo norte de Galicia

Na parroquia de S. Clodio , en Outeiro de Rei moi pretiño da cidade de Lugo , atopamos este singular recorrido circular pola Aldea das Formigas . Nunha ampla extensión de terreo, o seu creador Xosé Rodríguez argallou con materiais de refugallo este mundo de fantasía que busca contaxiar o espíritu da vida na aldea. Facer este percorrido, dunha hora aproximadamente, sorprenderanos polas creacións tanto de figuras de animais coma de construcións. Moita creatividade! Moi recomendable para ir con peques.

No concello de Outeiro de Rei (Lugo), á beira da confluencia do río Ladra co Miño , atópase esta fermosa área recreativa, tamén coñecida coma Campo de Santa Isabel , por estar moi preto da capela deste mesmo nome. Baixo unha fermosa carballeira e outras árbores de ribeira hai numerosas mesas e bancos, unha piscina fluvial aproveitando a represa do caneiro, e sobre todo o paseo á beira do río, que forma parte da ruta Camiño do Miño , para disfrutar deste entorno fluvial tan magnífico. Paraísos de Galicia!

A poucos km. da cidade de Lugo , en Outeiro de Rei , está este conxunto megalítico de Penas de Rodas , rodeado de petróglifos, mámoas, castros, xacementos romanos, etc. Hai algunhas teorías que o vinculan a un lugar sagrado e de culto na antigüidade; outras relacionáno coa astronomía indicando que podería ser un dos primeiros calendarios solares e que os dous grandes rodos simbolizarían a Terra e o Sol; para outros non é máis ca unha formación natural, pero tan rodeada de lendas, que a convertirían nun lugar máxico. O lugar ten unha ampla área recreativa con mesas, bancos, fontes, á sombra das árbores e repartidos entre os penedos; incluso hai un gran palco para a romaría anual que celebran os veciños en verán. Un lugar tan impresionante que merece unha visita. Paraísos!