Polo norte de Galicia

A praia de Chanteiro é unha das xoias do concello de Ares . Para min é obrigatorio visitala e disfrutar do magnífico entorno cada pouco tempo. Paraísos de Ares !

Un recuncho paradisíaco do concello de Ares é a Praia Pequena de Chanteir o. Xogando coa marea baixa aparece e desaparece para soprendernos sempre coa súa beleza. Pisar a area, sentarse nunha rocha a observar o mar no seu constante movemento, deixarse envolver pola airexa marítima, notar a calma que nos vai conquistando...Un paraíso!

Neste comezo de xuño xa se pode empezar a disfrutar de momentos de praia. A praia de Chanteiro é unha das moitas e fermosas praias e calas que ten o concello de Ares , e ao resultar tan difícil elexir unha delas, o mellor é ir variando e disfrutar de todas!

Esta camiñata, dende o aparcadoiro da praia de Chanteiro , polo camiño de Salgueiras , a punta de O Segaño , e seguindo pola senda costeira da entrada da ría de Ferrol ata o castelo de A Palma , é un regalo para os sentidos. A costa das dúas marxes da ría é espectacular, coas baterías costeiras, os castelos, as abundantes calas de augas turquesas. Estas pequenas calas son toda unha tentación, pero o acceso ás mesmas está practicamente imposible, o que é unha mágoa. Por exemplo a cala do Bonete do Cura é ben fermosa, e merece ter a baixada limpa. O merendeiro de Xunco Novo e a pequena fervenza do Cabalo , pola contra, vense coidados. Ao longo da senda sempre encontramos máis camiñantes ou ciclistas que, coma nós, disfrutan desta marabilla! Paraísos ao lado da casa!

Cunha sucesión de borrascas afectando a todo o país, e a borrasca Juan traendo moita chuvia e neve, estas imaxes do paseo do serán de onte atestiguan que non é preciso buscar destinos paradisíacos noutros lugares afastados. O paraíso está aquí, na casa. Despois do paseo ata O Segaño polo camiño de Salgueiras , baixar ata a cala da Praia Pequena de Chanteiro coa marea baixa é o colofón desta tarde de xaneiro. O mar acariciando a area, o sol xogando coas nubes e quentando o ambiente, as rochas do cantil figurando esculturas pétreas, a ausencia de ruidos, un pescador alá ao lonxe,...PAZ! Ares é un paraíso!

Nunha solleira tarde de decembro un paseo pola punta de Coitelada en Chanteiro é unha marabilla. Pola ruta 2 iremos costeando e disfrutando da costa de Ares . Dende a mesma punta subimos ata a batería costeira de Sudova e dende alí ata Campelo . Sobre Montefaro unha fermosa lúa recordábanos que o solpor en decembro chega pronto. Paraísos na casa!

Buscando o solpor, fomos ata a praia de Chanteiro , polo paseo do camiño de Salgueiras ata o Segaño . O noso concello ten moitos lugares para disfrutar de fermosos solpores e este é un deles. Nesta época do ano a praia xa está en sombra, pero a banda de Salgueiras recibe os últimos raios e o paseo resulta moi agradable. Hai varios bancos ao longo del para pararse a disfrutar da paisaxe co son do mar batendo na costa. O solpor de hoxe non foi dos mellores, pero resulta unha delicia de todos modos. Paraísos ao lado da casa!

A ermida da Mercé de Chanteiro formaba parte dun convento franciscano do s.XIII que estivo neste lugar ata que, no ano 1393 o arcebispo compostelán Juan García Manrique concede a Fernán Pérez de Andrade licenza para edificar o convento de Sta. Catarina de Montefaro para os mesmos monxes franciscanos aos que cederá a ermida e dispón que cinco destes frades sexan os encargados de atendela. A ermida pertence ao románico tardío con elementos oxivais coma a bóveda cruzada, os arcos apuntados da nave e o da entrada a ábsida rectangular; outros elementos son románicos coma os capiteis das semicolumnas. A súa única nave está dividida en tres tramos cotrarrestados no exterior por contrafortes . A fachada refíxose séculos despois e conserva o dintel da porta primitiva, dous contrafortes e unha imposta baixo a que hai tres ganchos pétreos. As catro figuras da portada, baixo o arco lixeiramente apuntado, están moi erosionadas e tres delas teñen as cabezas de cemento despois de sufrir un ...