Polo norte de Galicia

Chega o Antroido , e con este día de auga, apetece poñerse a preprar uns freixós . A gastronomía é unha parte importante do noso patrimonio; é unha viaxe no tempo e tamén un nexo cos devanceiros que nos ensinaron esas preparacións, son os recordos de bos momentos nas cociñas familiares que debemos pasar ás novas xeracións.

Cando sentimos a necesidade da montaña, dos cumes solitarios, dos paraños, dos profundos vales sucados por ríos ou regatos, do frío aire batendo no corpo, do silencio (roto as máis das veces polos aeroxeneradores),...collemos a vía rápida ata As Pontes ou Muras, Ourol ou xa directamente ata O Xistral, e despois, por estradas secundarias ou simples pistas, "perdémonos" entre montes e vales. Sempre hai algo sorprendente que chame a atención e nos faga parar ao seu carón. Pode ser un mirador dende o que otear uns horizontes grandiosos, salpicados de pequenos rueiros vellos e posiblemente abandonados. Pode ser unha serie de cruces de pedra espalladas polos camiños que nos falan de vellas tradicións ou supersticións. Un patrimonio humilde pero importante e fermoso, que moitas veces mostra abandono. Pode ser unha das moitas marabillas que temos na nosa terra!

Dende O Pieiro , sobre cabo Prioriño , a perspectiva do Golfo Ártabro é magnífica, xa que podemos observar perfectamente o arco do golfo dende Malpica ata Cabo Prior . Cun tempo algo borrascoso, as vistas seguen sendo espectaculares. Podemos apreciar o cabo Prior , as entrada da ría de Ferrol , Montefaro coa praia de Chanteiro aos seus pés, a entrada das rías de Ares, Betanzos e A Coruña , coa súa torre de Hércules algo confundida entre os edificios, o porto de Langosteira , Caión e Malpica coas Sisargas rematando o golfo polo sur. Ramón Otero Pedrayo deu esta denominación de Golfo Ártabro a esta costa que se correspondería co Portus Magnus Artabrorum dos xeógrafos grecorromanos. Nel están as rías de Ferrol, Ares, Betanzos e A Coruña . Se nos achegamos a Prioriño Chico , perdemos algo de perpectiva, pero estamos a carón do mar. Por outra banda, denomínase Costa Ártabra a un espazo natural declarado zona de especial conservación que abrangue os concellos d...

Un paseo mañaneiro, o sábado pasado, pola praia de Seselle pode resultar un deses magníficos agasallos que podemos facernos a nós mesmos: bo para a saúde tanto física coma mental, gratis e polo tanto bo para loitar contra o consumismo, bo para desconectar das redes e usar o teléfono so para facer fotos, bo para disfrutar das pequenas cousas e da vida sinxela, bo para esquecer as malas novas que parecen ameazar o mundo, ...

A fraga Máxica da Cortiña , no arboreto do paseo fluvial de San Sadurniño , agora no inverno tamén merece unha visita. As árbores espidas, dan todo o protagonismo a eses seres máxicos que 2Duendes crearon con troncos e unha motoserra. Neste circuito de figuras e pasarelas de madeira, os nen@s disfrutarán mantendo o equilibrio, saltando, correndo, escalando, observando bichos e árbores,... Un parque diferente, rodeado de natureza, para pasar unhas horas de disfrute neste magnífico entorno do concello de San Sadurniño .