Polo norte de Galicia

Un recuncho paradisíaco do concello de Ares é a Praia Pequena de Chanteir o. Xogando coa marea baixa aparece e desaparece para soprendernos sempre coa súa beleza. Pisar a area, sentarse nunha rocha a observar o mar no seu constante movemento, deixarse envolver pola airexa marítima, notar a calma que nos vai conquistando...Un paraíso!

Nun caloroso serán de xullo, un paseo pola beira do río Belelle (no concello de A Capela , no tramo entre Cabalar e Formariz ) é un luxo! Baixo a sombra do bosque de ribeira seguimos o curso do río, silandeiro unhas veces e cantareiro noutras, disfrutando desta fermosa paraxe. Nunha publicación anterior xa describín con detalle esta ruta; desta volta, unhas imaxes abondan. Paraisos do norte de Galicia !

Un paseo moi aconsellable para un serán de verán pode ser este do Parque etnográfico do río Sesí n (concello de A Capela ), do que xa falamos ampliamente nunha publicación anterior no blogue. Un parque que é unha fermosa homenaxe dos habitantes deste concello aos seus devanceiros, que souberon explotar os recursos naturais sen esgotar nin destruir o medio. Nel, ademais da maxia e a fermosura do entorno, atopamos explicados exemplos do rico patrimonio etnográfico das tradicións artesanais vencelladas á explotación dos recursos e algunha mostra da arquitectura tradicional (muiño, ponte, curripa,...). Se gustamos do paseo podemos continualo polo Camiño Vello de Caaveiro e achegarnos ata a Casa do Pazo ( Museo Etnográfico).

A noite de S. Xoán , en Galicia é unha noite máxica , chea de tradicións que perduran no tempo: as fogueiras do lume novo que enchen as vilas e aldeas e que hai que saltar un número impar de veces para que sexan purificadores os seus poderes, os ramos de flores que se colgan no exterior das casas para protexelas das meigas que esta noite están especialmente tolas, a auga purificadora que se prepara coas sete herbas (variables según os lugares) para lavarse ao mencer, as ceas comunitarias arredor das fogueiras con sardiñas asadas, cachelos, pan de millo, a festa e a troula desta noite, ... Fermosas tradicións que forman parte do patrimonio inmaterial de Galicia que conservamos con orgullo e festexamos ano tras ano. As fogueiras, se hai unha praia cerca adoitan facerse nela, pero poden facerse noutros lugares: na horta, nun solar, nunha eira, nun camiño pouco transitado,...

Na marabillosa costa de Loiba , en Ortigueira ,está este miradoiro de Pena Furada dende o que temos unhas magníficas perspectivas desta costa e das moitas praias e ribeiras virxes que a conforman. O mar e o vento erosionan esta costa creando formas sorprendentes e moi fermosas. As baixadas a estas praias non son moi doadas, pero ben merecen o esforzo. Paraísos das nosas costas!

Coñecer e degustar a cociña local podemos considerala unha experiencia sensorial e tamén cultural. Na gastronomía identifícase a identidade e a autenticidade do lugar que visitamos. En Galicia temos unha gastronomía variada con produtos do mar e da terra de gran calidade , elaborados con técnicas tradicionais ou actuais, para que a parte gastronómica sexa un aspecto importante das nosas viaxes polo norte de Galicia.

Neste comezo de xuño xa se pode empezar a disfrutar de momentos de praia. A praia de Chanteiro é unha das moitas e fermosas praias e calas que ten o concello de Ares , e ao resultar tan difícil elexir unha delas, o mellor é ir variando e disfrutar de todas!

Este é o aspecto que presenta o encoro do Eume nestes días de finais de maio. O espectáculo da auga!