Polo norte de Galicia

No xornal La voz de Galicia de hoxe falan da estrea na TVG da película "Os amantes de Abrente" , baseada na serie "Saudade de ti" . Esta serie ten moitas escenas de exteriores filmadas no concello de Ares . Unha das fotos que ilustra a noticia mostra unha escena rodada na Barrosa. A Barrosa "namora".

Xa di o refrán que antes da tormenta vén a calma. A borrasca Óscar causando estragos no país e en Ares , onte ás cinco do serán, esta era a calma que había na ría: o mar tranquilo coma un prato víase así dende A Barrosa ! Achegarse ata esta cala para admirar a ría, otear o horizonte, observar os movementos dun mergullador saíndo do mar ou das gaivotas, notar a airexa que refresca a calor abafante destes días,notar o aroma das madreselvas no cantil... todo un luxo! Vivimos no Paraíso .

Na parroquia de S. Martiño de Covas , en Ferrol, atopamos esta ermida de S. Comba , que só podemos visitar con marea baixa. Localizada na Insua da Santa ou do Medio, xa os romanos construíron nela un templo, máis tarde cristianizado. A primeira referencia documentada é do s.XII. É unha sinxela ermida románica de planta rectangular , dunha soa nave e espadaña simple. No interior hai un arco mudéxar, testigo da súa antigüidade. Arredor dela hai moitas fermosas lendas. Unha conta que a santa, acompañada do seu fillo S. Silvestre,chega por mar ata aquí, nunha barca de pedra. Curiosa a frecuencia das barcas de pedra nas lendas galegas! A praia de Sta. Comba , a carón do illote, é un areal de fina area branca e magnetita en forma de gravilla negra, ventosa e de forte ondaxe, moi frecuentada polos amantes do surf. Dende aquí hai unhas magníficas vistas dos aguillóns chamados Os Cabalos na punta do cabo Prior , e no outro lado, a praia de Ponzos ,etc. Paraísos de Ferrolterra !

As Cetáreas do Sarridal en Cedeira , son un exemplo magnífico da recuperación dun espazo de gran valor etnográfico e paisaxístico. Son mudas testemuñas da importancia da pesca e o marisqueo na ría de Cedeira . Eran os viveiros nos que se gardaban e engordaban as capturas de marisco, sobre todo langosta, para a súa posterior venta. Dende o aparcadoiro do Castelo da Concepción vaise ata a cala de Sonreiras e un sendeiro nas pedras condúcenos ata elas. Alí atoparemos paneis informativos que explican a importancia das mesmas. Moi recomendable!

A igrexa de Sta. María de Labrada , en Guitiriz , pode pasar case desapercibida por estar medio escondida no seu entorno. É unha igrexa rural de orixe románica, reconstruída entre finais do XVII e principios do XVIII, que garda un tesouro no seu interior: uns frescos góticos de finais do XV- principios do XVI que se descubriron nos anos 90. Esta igrexa é o unico que se conserva do antigo mosteiro medieval coñecido coma A Granxa. Según un documento do s.XII, Fernando II de León, donaba A Granxa de Labrada ao mosteiro de Monfero. No muro Sur consérvase a porta primitiva. A carón das escaleiras que baixan ao adro, hai dous fermosos cruceiros. Ante a sinxela beleza da igrexa, chama a atención o cemiterio neo-gótico , cos fermosos pináculos labrados en pedra polos canteiros da Terra Cha.

O Castro do Sarridal , en Cedeira , é un dos asentamentos castrexos máis importantes do noroeste galego. Abarca a península do Sarridal e no seu itsmo presenta un sistema defensivo con dous profundos foxos e dúas murallas de gran monumentalidade. Ademais tiña un sistema de torreóns defensivos unidos ás murallas para reforzalas. Ao estar rodeado de altos cantís polo entorno da península, era inaccesible por mar. Foi un asentamento bastante grande; calcúlase que puido albergar preto do medio millar de persoas, que vivían da pesca, caza e agricultura. O elememto arquitectónico máis destacado, do que está ao descuberto, é o forno, edificio adicado aos baños de vapor. A datación por Carbono 14 indica que é de arredor do 230 a.C., polo tanto anterior á chegada dos romanos; sería unha sauna totalmente castrexa. En Galicia (de momento) hai só 5 edificios deste tipo. No panel explicativo hai abundante información da estructura e funcionamento destas saunas. Nas sete campañas arqueolóxicas, ...